السلام عليكم ورحمة الله... معاكم Kaito :)

مرحبا بيكم فالنهار السابع ديال سلسلة 30 يوم من التعلم الآلي..

اليوم كان صراحة صعيب

ملقيتش الوقت نكتب على الموضوع اللي كنت باغي نكتب عليه

حيت كانت عندي قراية النهار كامل

وكان عندي ميدار.. والله

ولكن على أي..

اليوم غدي نخصصو يكون يوم راحة

ونجاوب فيه على الاسئلة اللي جاوني بزاف

وغدا ان شاء الله ندخلو فالمعقول

س1:

انا عاد تسجلت وموصلونيش الايمايلات القدام فين نلقاهم؟

ج:

غتلقاهم كاملين فهاد الليان هنايا => Link

س2:

ايلا بغيت نبدا هاد الضومين واش خص ديجا نعرف نكودي؟

ج:

فهاد السلسلة باش تفهمها بشكل عام مغديش تحتاج تكودي

اذن تقدر تتبع معايا بدون معرفة مسبقة للبرمجة

حيتاش هاد newsletter درتها للمغاربة كاملين

باش نديرو "محو الامية" ديال التعلم الالي فالمجتمع

باش تناقش الافكار بطريقة صحيحة

وماشي دكشي اللي كنشوفو دبا

ولكن باش تدير التطبيق ديال الخوارزميات..

غيخصك صراحة تعرف الاساسيات ديال البرمجة

حيت باش تطبق غيصحك تكودي

ومن اللغات اللي تقدر تعلم هما صراحة من اللغات سهلة وسريعة التعلم

بايثون Python و أر R

ايلا مكنتيش كتعرف تكودي .. ماشي مشكل

كاينين مواقع كيعطيوك الفرصة تطبق نموذج تعلم الي ديالك machine learning model

غير عطيه الداتا وهو غادي يتكلف

جرب هاد السيت: Teachable Machine by Google

خربق فيه شويا ورد عليا الخبار

وايلا بغيتي تقاد دكشي لراسك

راه كاينين بزاف ديال المصادر resources فين تقدر تعلم

ختار شي درس فيوتيوب اولا كورسيرا..

زيد معاهم شات جي بي تي

وتوكل على الله

س3:

واش غتدوي على التعلم العميق deep learning ؟

ج:

نعم..

مغنتعمقوش فيه ولكن ضروري غنشوفوه

حيتاش غندويو على ChatGPT

المفهوم ديال GPT

وباش مقاد وكيفاش كيخدم هاد ChatGPT

وماشي غير هو..

حتا midjourney و sora و دكشي كامل

مزااال الخير والبركة

س4:

واش كاينين شي مصادر فين نتعلم راني حاير؟

ج:

الصديق و المعلم اوغواي ديالنا "طه بوحسين" عندو واحد التشكيلة

فيها اجود courses اللي تقدروا تختارو

ماشي غير ف machine learning

اولا deep learning

ولكن فاي حاجة اخرى فالضومين

أنا خديت منها شلا ديال الدروس اللي نفعوني

المهم هاداك راه كنز غنخليه ليكم هنايا تكتاشفوه

داير بحال السويقة.. اللي تشهيتيها كتقداها ههه

وخونا ماشي غير جا وجمعهوم هكاك

راه شاف وقرا دوك الدروس ف 5 سنين كاملة

دخل تشوف هنايا => Courses and Tools

س5:

واش هاد الاي أي غيدي لينا خدمتنا؟

ج:

غدي يديها ليك ايلا متعلمتيش ليه..

وهادي هيا اللي قلنا فأول ايمايل..

المهم هادو كانو اسئلة خفاف ظراف على الايام اللي دازو..

نتلاقاو فايمايل اخر غدا!

كنتمنى تكونو استافدتو.. ايلا عندكم شي تساؤل اولا مشرحتش شي حاجة مزيان، غير صيفط ليا رد فهاد المايل نيت..

— Kaito

ملاحظات:

• ايلا بغيتي تعرف كثر على الضومين ديال AI فالمغرب واشياء اخرين راه دوينا عليهم فهاد البودكاست وجاوبنا على مختلف الاسئلة الشائعة..

  تفرج هنا

  
  

• ايلا عاجبك هدشي وقادر باش تساند هاد newsletter بدعم مادي

  دخل لهنا: https://ko-fi.com/callmekaito

  شكرا (: