السلام عليكم ورحمة الله... معاكم Kaito :)

مرحبا بيكم فالنهار السادس ديال سلسلة 30 يوم من التعلم الآلي..

وصلني واحد الميساج فانستجرام البارح

وصراحة عجبني السؤال بزاف شكرا صديقي

علاش؟

حيث هاد الكلمة ديال الغرويتم اولا خوارزمية

كلمة اللي معروفة بزاف

ماشي غير ف machine learning

ولكن فالضومين ديال التك كاامل

وغتكون كتسمعها بزاف ولكن معارفش المعنى ديالها

دكشي علاش قلت..

قبل منيدا نشرح فالخوارزميات ديال التعلم الالي اللي كاينين

نشرح بعدا شناهو المعنى ديال خوارزمية؟

الخوارزمية هي مجموعة من التعليمات او الاوامر اللي كيكونو مرتبين

باش تحل شي مشكل فالرياضيات اولا اي مشكل كتواجهو فالحياة اليومية

فواحد الزمن محدد وعدد خطوات محدد حتا هو.

هاد الخطوات خص يكونو واضحين ومرتبين

وفالاخر النتيجة ديالهم خص تكون هو حل المشكلة..

هاد الخوارزمية بحال شي اعداد لوصفة طبخ،

تخيل باغي تقاد كيكة،

ماشي كتجي غير هكاك وكتقاد عشوائيا…

عندها خطوات خصك تديرهم وحدة بوحدة،

كتبدا بالمقادير الضرورية،

حتى كتوصل للخطوة ديال تخرجها من الفران وتزيد عليها الشكلاط الفوق..

واللي هي اخر خطوة (كنظن.. عمرني طيبتها الله اعلم..)

مغندويوش على التاريخ ديالها ومنين جات دكشي كاين فويكيبيديا

البلان كيدوز بحال هكا:

المدخلات input هوما البيانات ديالنا، هوما الداتا اللي غتفيدنا باش تعطينا النتيجة..

ال input بحال ايلا قلتي البيض، الدقيق، الحليب، السكر..

المقادير اللي غادي تحتاج باش تبدا هما المدخلات ديال الوصفة ديالك

كيجي algorithm كيشد دوك المعطيات وكيطبق عليهم الخطوات اللي عندو واللي خص يدير

فالمثال ديالنا algorithm هما تطبيق ديال طريقة التحضير، كنشدو البيض كنخلطوه مع الدقيق كنزيدو سنيدة كنقادو كنفعلو………..

المخرجات او output هو دكشي اللي خرجات ليك الخوارزمية من بعد مطبقات الخطوات اللي فيها كاملين،

هي ديك الكيكة اللي طيبتي..

هادا هو بلان الخوارزميات يصفة عامة

بالنسبة للmachine learning algorithms

تقريبا نفس الكونسيبت

غير هو مقلوب

فالبرمجة العادية كان كيكون عندنا بيانات وخطوات باش فالاخر كتعطينا نتيجة

مثلا عندنا 2 تفاحات و 3 ليمونات درنا ليهم خوارزمية عملية الجمع وعطاتنا 5 فالمجموع

ولكن فالخوارزمية ديال machine learning

كنعطيوها الداتا وكنعطيوها النتيجة، وهي كتلقا لينا دوك الخطوات،

كتحاول هي تعرف دوك الخطوات اللي خط تدير..

باش من بعد ملي نعطيها داتا جديدة تعطيني نتيجة

بحال ايلا قلتي عطيناه هاد المرة 2 تفاحات و 3 ليمونات وعطيناه 5 كنتيجة,

خص هو يعرف بلي هاد الخطوات اللي تدارو هما الجمع +

وبلي هاد الجمع هو اللي عطانا ديك 5

هو نفس الحاجة تقريبا عادي ولكن الخطوات ماشي انا اللي برمجتهم

الخوارزمية هي اللي برمجتهم

هاد الخوارزميات هما المحركات اللي اللي كتحرك التعلم الالي وكتخليه يتعلم،

هاد الalgorithms هما اللي كيتيحو للالات التعلم من البيانات وتوقع النتائج..

هاد algorithms هوما اللي كيحددو patterns من الداتا وكيستعملو هاد patterns باش يعطيونا توقعات جديدة على داتا جديدة…

بكل اختصار algorithms هما العقل المدبر ديال اي مشروع تعلم الي..

فالمثال اللي كنعطيو ديما ديال توقع ثمن الديور،

بناء على المشكلة المطروحة قلنا ديجا بلي المشكل مشكل انحدار regression problem

اذن غنمشيو نقلبو ونطبقو واحد من خوارزميات الانحدار.. وهما اللي غنشوفو فالايام الجايين

من بعد مختارينا الخوارزمية اللي بغينا نخدمو بيها، غنعطيوها تاكل…

غنعطيوها الداتا اللي عندنا من بعد منقيناها وكلشي..

باش تتدرب وتعلم الانماط اولا العلاقة اللي بانت ليها كاينة بين features و target , بين الميزات والثمن…

من بعد مكتدرب هاد الخوارزمية، كاتكون مستعدة باش تعطيك output ,

اي تقدر تعطيها ميزات منزل جديد مكانش فالداتا قبل

باش تعطي ليك الثمن المتوقع ديالها

ومن بعد كدير مقارنة كتشوف واش الثمن الموقع قريب للثمن الاصلي الحقيقي،

تما كتشوف وكتعطي تقييم لجودة الاداء ديال algorithm ديالك.

فالايام الجايين غنشوفو ان شاء الله بعض الخوارزميات (ماشي كاملين غير المشهورين) اللي كاينين، وكيفاش كيخدمو وشنو الفرق بين كل وحدة..

نتلاقاو فايمايل اخر غدا!

كنتمنى تكونو استافدتو.. ايلا عندكم شي تساؤل اولا مشرحتش شي حاجة مزيان، غير صيفط ليا رد فهاد المايل نيت..

— Kaito

ملاحظات:

• مصادر :

  اكاديمية حسوب

  ML 101

• ايلا عاجبك هدشي وقادر باش تساند هاد newsletter بدعم مادي

  دخل لهنا: https://ko-fi.com/callmekaito

  شكرا (: